【識愛】呢個世界有D人，真係唔可能有女朋友

（撰文：超哥）

外在型只係因為唔識打扮、冇錢打扮、冇錢社交、或者係沉迷某啲興趣，倒如動漫電玩；而內在型毒撚就係本身性格毒、唔鐘意social 、唔注重外表、或者本身個性格就有問題。

前者係有得救嘅，只要執執個造型，戒左啲動漫電玩癮，有返啲錢

一樣有pool出。後者則係死症，有錢都冇用，啲女仔都會頂佢唔順。

不幸地，我係後者。

早喺十六歲嘅時候，我同好多人一樣，都mk過。嗰啲論壇自貼區，我都經常出現。打下「十卜」、「好令」嗰啲更加係家常便飯。我甚至有出過去網聚，同成班mk一齊喺k房食煙。

喺學校就同啲同學一齊圍威喂，都算一個活躍嘅學生。搞下事，串下miss呢啲，當然有啦。所以呢啲風頭躉，身邊有女性朋友都唔出奇。

但到左十八歲嗰年，考會考。同啲同學各散東西之後，我上左中六，好多朋友都冇再做同學。

經過一段日子，佢地各自各有佢地嘅圈子，絕大部分人都已經冇再聯絡，身邊冇晒女性朋友。

經過兩年a level同兩年asso，我發覺其實我跟本係我性格有問題。原來我本身就唔識同人溝通，之所以啲女同學驚我，唔係因為我其貌不揚咁簡單，而係我行為怪異。例如：我會喺啲女仔前面整到自己好可憐咁，仲會不停眨低自己嘅自我型像。所以啲女仔，個個都覺得我好怪，好似痴線佬咁。後來我聽返啲中學同學講，其實中學啲女仔同學都覺得我好痴線。

嗰一刻，我先明白，呢個世界，有啲人，係要注定一世做毒撚。佢地根本唔適合同女性接觸。

見到一個台灣既遊戲展，有個靚女實況主，拋D簽名遊戲海報出去，之後成班毒撚，好似餓狗咁上去搶，呢d男人真係好可憐。睇完呢個節目，我就明白，好多人，其實係冇得救嘅。因為佢地連自我形象都可以唔顧。

如果大家身邊有啲毒男朋友，會顧及自我形象，又會呻冇女，個人都算幾好相處嘅時候。不妨叫佢考慮下執執個造型，係機會識到女朋友嘅，因為呢個世界，仲有好多人係完全唔可以正常同女性溝通嘅，而佢地係冇可能做到你對手。

超哥：網絡痴線佬，九十後facebook近況文學家

（文章來源：輔仁媒體）