【識時事】另一角度看《只是未到癡情處》

（撰文：火火）

最近台灣林奕含自殺，爆出「誘姦」方面的新聞，備受關注。呢件事其實好多面睇，就算輔仁《只是未到癡情處》都有部份觀點我係同意，篇文亦係一般人對林奕含嘅睇法，喺好有限嘅資訊之下落嘅評論。不過好少人能夠真係理解受害者嘅心態同無奈，我覺得香港人對呢方面理解好缺乏。不過可以坦承咁交流想法，能夠睇唔同觀點、反思、行動，我諗先會係呢件事帶俾我哋嘅啟發。

好難單靠片言隻語去判斷一件持續發生六年以上嘅事件，相信受害人嘅心理係會按階段性起不同變化，就好似「斯德歌爾摩症候群」亦係一種頗為複雜同微妙嘅受害人與施害者之間嘅心理變化。

而且，《房思琪的初戀樂園》始終係一本小說，雖然按推論同埋作者父母嘅講法，裡面嘅角色「係作者嘅親身經歷」，但始終呢番話唔係從作者嘅口出，所以本書入面有幾分係事實，有幾分係令故事更連貫嘅構想亦唔肯定。

我睇完成本書，覺得值得關注嘅係「房思琪式嘅性侵」事件當中嘅受害人心態，同埋社會入面唔同角色（包括父母、學校、青少年…）點樣作出保護措施，防止呢類比「集中營傷害更大」嘅事件繼續暗中發生。

對於只憑「睇小說」，就概括話林奕含(而唔係話房思琪)只係師生戀睇唔開嘅講法，我覺得太過簡化事件同片面。

PS：過去嘅工作入面，我亦曾經接觸過一啲遭遇過性侵(唔係陌生人強姦嗰種)而離家出走或者衍生其他問題嘅女仔，深深感受到佢哋內心嘅痛苦同埋撕裂感……

如果以同理心代入一個只有十三歲缺乏性教育嘅女生，或者會比較理解即使佢抗拒、討厭男老師作出嘅性要求，但佢當時唔識得點反應、點處理。

事件發生之後，佢擁有一般性罪行受害者嘅部份特徵：覺得自己好污糟、討厭自己當時唔反抗、唔配得擁有幸福、羞恥…即使佢嘗試想同父母講，但唔成功。最後內心嘅撕裂慢慢演變成嚴重精神病。

現時法律有「衰十一」、性罪犯資料庫針對細路仔嘅教師，亦係表明一般未成年嘅青少年係未夠成熟需要被保護。

————–

火火．人生背包客，喜歡探索各地風土民情，目前遊走過33個國家，66個城市。